पालकमंत्री प्रताप सरनाईक थेट दुष्काळग्रस्त शेतकऱ्यांच्या बांधावर: उपमुख्यमंत्री शिंदेंशी थेट व्हिडिओ कॉलवरून संवाद
धाराशिव | लोकविचार
धाराशिव जिल्ह्यातील दुष्काळग्रस्त भागाची पालकमंत्री प्रतापराव सरनाईक यांनी आज थेट शेतात आणि बांधावर जाऊन पाहणी केली. यावेळी खासदार ओम राजेनिंबाळकर आणि जिल्हाधिकारी किर्ती किरण पुजार उपस्थित होते. पावसाअभावी करपलेली पिके, पाणीटंचाई तसेच जनावरांच्या चाऱ्याची समस्या याबाबत पालकमंत्र्यांनी शेतकऱ्यांशी प्रत्यक्ष संवाद साधून त्यांच्या अडचणी जाणून घेतल्या.
शेतकऱ्यांच्या समस्या ऐकून घेतल्यानंतर सरनाईक यांनी थेट बांधावरूनच उपमुख्यमंत्री एकनाथ शिंदे यांच्याशी व्हिडिओ कॉलद्वारे संपर्क साधला. पीक नुकसान, पीकविमा तसेच चारा-पाण्याच्या टंचाईची माहिती त्यांनी उपमुख्यमंत्र्यांना दिली. यावेळी शिंदे यांनी शेतकऱ्यांशी संवाद साधत त्यांना धीर दिला आणि प्रशासनाला तातडीने मदत पोहोचवण्याचे आदेश दिले.
धाराशिवमधील एकाही शेतकऱ्याला वाऱ्यावर सोडणार नाही. या कठीण काळात महायुती सरकार बळीराजाच्या पाठीशी खंबीरपणे उभे असून, शेतकऱ्यांना लवकरात लवकर शासकीय मदत मिळवून देण्यासाठी पूर्ण ताकदीने प्रयत्न केले जातील, अशी ग्वाही पालकमंत्री सरनाईक यांनी दिली.
लोकविचार सत्य शोधून लिहिण्याची ताकद संपादक अमजद सय्यद 8390088786
