लोकविचार इम्पॅक्ट! कळंब नगरसेवक मोहसीन सलीम मिर्झा ची ठाकरे गटातून हकालपट्टी जिल्हाप्रमुख तथा आमदार कैलास घाडगे-पाटील यांची तात्काळ कारवाई
कळंब | लोकविचार
परभणीतील ड्रग्ज कारवाईनंतर कळंबशी संबंधित नगरसेवकाचे नाव समोर आल्याच्या वृत्ताला ‘लोकविचार’ने दोन दिवसांपूर्वी प्रसिद्धी देत ठाकरे गटाच्या भूमिकेवर थेट प्रश्न उपस्थित केला होता. या वृत्ताची दखल घेत शिवसेना (उद्धव बाळासाहेब ठाकरे) पक्षाचे जिल्हाप्रमुख तथा आमदार कैलास घाडगे-पाटील यांनी संबंधित नगरसेवकाची पक्षातून तात्काळ हकालपट्टी केली आहे.
परभणी पोलिसांच्या अमली पदार्थविरोधी कारवाईत कळंबशी संबंधित मोहसीन सलीम मिर्झा याच्यावर कारवाई झाल्याची माहिती समोर आल्यानंतर कळंबमधील एमडी प्रकरण पुन्हा चर्चेत आले होते. मिर्झा हे ठाकरे गटाशी संबंधित नगरसेवक असल्याने पक्ष त्यांच्यावर कारवाई करणार की पाठीशी घालणार? असा सवाल ‘लोकविचार’ने उपस्थित केला होता.
तुळजापूरमधील ड्रग्ज प्रकरणात पक्षाचे आमदार कैलास घाडगे-पाटील यांनी आक्रमक भूमिका घेतली होती. त्यामुळे कळंबशी संबंधित नगरसेवकावर कारवाईची माहिती समोर आल्यानंतर पक्षाची भूमिका काय राहणार, याकडे संपूर्ण जिल्ह्याचे लक्ष लागले होते.
‘लोकविचार’च्या वृत्तानंतर या प्रश्नाला आता स्पष्ट उत्तर मिळाले असून, जिल्हाप्रमुख तथा आमदार कैलास घाडगे-पाटील यांनी संबंधित नगरसेवकाची पक्षातून हकालपट्टी केली आहे. त्यामुळे ‘लोकविचार’ने उपस्थित केलेल्या प्रश्नावर ठाकरे गटाने तात्काळ निर्णय घेतला आहे.
दरम्यान, परभणीतील कारवाई आणि कळंबमधील एमडी प्रकरणाचा परस्पर काही संबंध आहे का, हे अद्याप तपासातून स्पष्ट होणे बाकी आहे. संबंधित व्यक्तीवरील आरोप न्यायालयीन प्रक्रियेत सिद्ध होणेही आवश्यक आहे. मात्र, पक्षाशी संबंधित व्यक्तीवर झालेल्या पोलिस कारवाईनंतर पक्षाने घेतलेल्या तात्काळ निर्णयामुळे राजकीय वर्तुळातही या कारवाईची चर्चा सुरू झाली आहे.
एकीकडे ड्रग्जविरोधात आक्रमक भूमिका आणि दुसरीकडे पक्षाशी संबंधित नगरसेवकावर कारवाई—‘लोकविचार’ने उपस्थित केलेल्या प्रश्नाची दखल घेत ठाकरे गटाने घेतलेल्या निर्णयामुळे ‘लोकविचार इम्पॅक्ट’ पुन्हा चर्चेत आला आहे.
लोकविचार — सत्य शोधून लिहिण्याची ताकद संपादक अमजद सय्यद 8390088786
