दुधोडीसह १० गावांची एसटीसाठी एकजूट ग्रामपंचायतींच्या स्वतंत्र निवेदनांतून बससेवा सुरू करण्याची जोरदार मागणी
धाराशिव लोकविचार
परंडा-भूम-वाशी विधानसभा मतदारसंघातील दुर्गम भागातील नागरिकांना सार्वजनिक वाहतुकीची सुविधा उपलब्ध व्हावी, यासाठी दुधोडीसह परिसरातील दहा गावांनी एकत्रित पुढाकार घेतला आहे. दुधोडी, गिरळगाव, जोतिबाचीवाडी, पारगाव, नाफरवाडी, अनपटवाडी, निपाणी, आंद्रुड, पाक्रूड आणि दिघोल येथील समस्त ग्रामस्थांनी आपापल्या ग्रामपंचायतीमार्फत महाराष्ट्र राज्य मार्ग परिवहन महामंडळ विभाग नियंत्रक यांच्याकडे स्वतंत्र निवेदने सादर करून नवीन एसटी बससेवा तातडीने सुरू करण्याची मागणी केली आहे.
भाजपचे परंडा-भूम-वाशी विधानसभा मतदारसंघाचे प्रमुख बाळासाहेब क्षीरसागर यांनीही विभाग नियंत्रक, महाराष्ट्र राज्य मार्ग परिवहन महामंडळ, धाराशिव यांच्याकडे निवेदन देत दुधोडी व परिसरातील १० ते १५ ग्रामपंचायतींना जोडणारी एसटी बससेवा सुरू करण्याची मागणी केली होती.
भूम–वार्शी–वालवड–पाथरूड–दुधोडी–जोतिबाचीवाडी–पाक्रूड–आंद्रुड–निपाणी–जातेगाव–दिघोल–पाटोदा असा मार्ग निश्चित करून बससेवा सुरू करावी, तसेच पाटोदा येथून सकाळी सुमारे ६.३० वाजता बस सुटावी, अशी मागणी करण्यात आली आहे.
या बससेवेचा लाभ विद्यार्थी, शेतकरी, महिला, ज्येष्ठ नागरिक, रुग्ण तसेच सर्वसामान्य नागरिकांना होणार असल्याने ग्रामस्थांनी एकमुखाने ही मागणी लावून धरली आहे. ग्रामपंचायतींकडून स्वतंत्र निवेदने सादर झाल्यामुळे या मागणीला अधिक बळ मिळाले असून, एसटी महामंडळाने सकारात्मक निर्णय घेऊन लवकरात लवकर बससेवा सुरू करावी, अशी अपेक्षा नागरिकांनी व्यक्त केली आहे.
Lokvichar – लोकविचार सत्य शोधून लिहिण्याची ताकद संपादक अमजद सय्यद 083900 88786
