भाजपा नेते “नितीन बप्पा शेरखाने पुन्हा खा.ओमराजेंच्या संपर्कात! धाराशिवच्या राजकारणात नव्या समीकरणांची चर्चा!
भाजपचे मातब्बर नेते व राष्ट्रीय चर्मकार संघाचे नेतृत्व करणाऱ्या नितीन शेरखाने यांच्या भेटीने पक्षप्रवेशाच्या चर्चांना उधाण…
धाराशिव लोकविचार
धाराशिवच्या राजकीय वर्तुळात पुन्हा एकदा नव्या राजकीय समीकरणांची चर्चा रंगू लागली आहे. भारतीय जनता पक्षाचे मातब्बर नेते तसेच राष्ट्रीय चर्मकार संघाचे प्रदेश कार्याध्यक्ष तथा प्रभावी नेतृत्व म्हणून ओळख असलेले नितीन (बप्पा) शेरखाने यांनी आज खासदार ओमराजे निंबाळकर यांच्या धाराशिव येथील संपर्क कार्यालयात भेट घेतल्याने विविध राजकीय तर्क-वितर्कांना उधाण आले आहे.
एकेकाळी खासदार ओमराजे निंबाळकर आणि आमदार कैलास पाटील यांचे खंदे समर्थक तसेच कट्टर शिवसैनिक म्हणून नितीन शेरखाने यांची ओळख होती. मात्र नगरपरिषद निवडणुकीपूर्वी त्यांनी शिवसेना ठाकरे गटाला रामराम ठोकत भारतीय जनता पक्षात प्रवेश केला होता.
त्यानंतर त्यांनी भाजपच्या संघटनात्मक कामात सक्रिय भूमिका बजावत पक्षासाठी सातत्याने खिंड लढवली.जिल्हा परिषद निवडणुकीच्या पार्श्वभूमीवर त्यांनी भाजपकडून सांजा गटातून उमेदवारीची अपेक्षा व्यक्त केली होती. मात्र उमेदवारी न मिळाल्याने ते पक्षावर नाराज असल्याची चर्चा त्यावेळी राजकीय वर्तुळात होती.दरम्यान, खासदार ओमराजे निंबाळकर यांनी शिवसेना शिंदे गटात प्रवेश केल्यानंतर जिल्ह्यातील अनेक राजकीय समीकरणे बदलण्यास सुरुवात झाली आहे.
अशा परिस्थितीत आज नितीन शेरखाने यांनी खासदारांच्या संपर्क कार्यालयात घेतलेली भेट विशेष महत्त्वाची मानली जात असून, त्यांच्या संभाव्य राजकीय भूमिकेबाबत चर्चांना अधिक वेग आला आहे.या भेटीमुळे नितीन शेरखाने पुन्हा ओमराजे निंबाळकर यांच्या नेतृत्वाखाली नवी राजकीय इनिंग सुरू करणार का, याकडे धाराशिव जिल्ह्याचे लक्ष लागले आहे. मात्र याबाबत कोणतीही अधिकृत घोषणा झालेली नसून, येत्या काही दिवसांत त्यांच्या पुढील राजकीय भूमिकेबाबत चित्र स्पष्ट होण्याची शक्यता व्यक्त केली जात आहे.
लोकविचार सत्य शोधून लिहिण्याची ताकद संपादक अमजद सय्यद 8390088786
