ACBची कारवाई – छेडछाड प्रकरण दडपण्यासाठी ५ हजारांची लाच मागणाऱ्या शिराढोण पोलीस ठाण्यातील पोलिस कॉन्स्टेबलविरुद्ध गुन्हा…
धाराशिव लोकविचार
छेडछाडीच्या तक्रार अर्जावर कारवाई न करण्यासाठी आणि प्रकरण मिटवून टाकण्यासाठी ५ हजार रुपयांची लाच मागितल्याचा आरोप शिराढोण पोलीस ठाण्यातील एका पोलिस कॉन्स्टेबलवर सिद्ध झाल्यानंतर त्याच्याविरुद्ध गुन्हा दाखल करण्याची प्रक्रिया सुरू करण्यात आली आहे. ही कारवाई लाचलुचपत प्रतिबंधक विभाग (ACB), धाराशिव यांनी केली.
लाचलुचपत प्रतिबंधक विभागाकडे तक्रारदाराने २१ मे २०२६ रोजी लेखी तक्रार दिली होती. तक्रारदाराच्या नातवाविरुद्ध छेडछाडीचा अर्ज प्राप्त झाल्याचे सांगून त्या अर्जावर कारवाई न करण्यासाठी आणि प्रकरण मिटवून देण्यासाठी शिराढोण पोलीस ठाण्यात कार्यरत असलेले पोलिस कॉन्स्टेबल अतुल संपत जाधव (वय ३४) यांनी ५ हजार रुपयांची लाच मागितल्याचा आरोप तक्रारीत करण्यात आला होता.
या तक्रारीची पंचासमक्ष पडताळणी करण्यात आली असता, पोलिस कॉन्स्टेबल जाधव यांनी तक्रारदाराकडे ५ हजार रुपयांची लाच मागितल्याचे निष्पन्न झाले. तसेच ही रक्कम २३ मे २०२६ रोजी स्वीकारण्याचेही त्यांनी सांगितल्याचे पडताळणीत स्पष्ट झाले.
यानंतर २३ मे रोजी लाचलुचपत प्रतिबंधक विभागाने सापळा कारवाई आयोजित केली. मात्र, तक्रारदार व पंच यांच्याबाबत संशय आल्याने आरोपी पोलिस कर्मचाऱ्याने लाचेची रक्कम स्वीकारण्यास नकार दिला. त्यामुळे प्रत्यक्ष लाच स्वीकारण्याची कारवाई पूर्ण होऊ शकली नाही.
दरम्यान, १८ जून रोजी तक्रारदाराने पुन्हा ACB कार्यालयात हजर राहून आरोपीस संशय आल्यामुळे तो पैसे स्वीकारणार नसल्याचे सांगितले आणि पुढील कायदेशीर कारवाई करण्याची विनंती केली. त्यानंतर पडताळणीदरम्यान लाच मागणी सिद्ध झाल्याच्या आधारे आरोपी पोलिस कॉन्स्टेबलविरुद्ध शिराढोण पोलीस ठाण्यात गुन्हा दाखल करण्याची प्रक्रिया सुरू करण्यात आली आहे.
लाचलुचपत प्रतिबंधक विभागाने आरोपीच्या घराची झडती घेण्याची प्रक्रिया सुरू केली असून, तो सध्या मिळून आलेला नसल्याने त्याचा शोध घेऊन अटक करण्यासाठी पथके रवाना करण्यात आली आहेत.
पोलीस अधीक्षक माधुरी केदार कांगणे, अपर पोलीस अधीक्षक शशिकांत सिंगारे तसेच उपअधीक्षक योगेश वेळापुरे यांच्या मार्गदर्शनाखाली पोलीस निरीक्षक विजय वगरे यांनी सापळा अधिकारी म्हणून काम पाहिले असून, पोलीस निरीक्षक बाळासाहेब नरवटे हे तपास अधिकारी आहेत.
दरम्यान, जिल्ह्यातील नागरिकांनी कोणत्याही शासकीय अधिकारी किंवा कर्मचाऱ्याकडून कायदेशीर शुल्काव्यतिरिक्त लाचेची मागणी झाल्यास तात्काळ लाचलुचपत प्रतिबंधक विभागाशी संपर्क साधावा, असे आवाहन लाच लुचपत विभागाकडून करण्यात आले आहे.
लोकविचार सत्य शोधून लिहिण्याची ताकद संपादक अमजद सय्यद 8390088786
