39 युनिट वापर, पण 12 हजारांचे बिल! महावितरणाच्या गलथान कारभाराने ग्राहक त्रस्त!
धाराशिव लोकविचार
धाराशिव शहरातील महावितरणाच्या कारभाराविषयी पुन्हा एकदा गंभीर प्रश्नचिन्ह निर्माण झाले आहे. तांबरी विभागातील माळी प्लॉट परिसरातील एका नवीन वीज ग्राहकाला केवळ 39 युनिट वीज वापर असतानाही तब्बल 12 हजार 750 रुपयांचे वीजबिल पाठविण्यात आल्याने संताप व्यक्त होत आहे.
विशेष म्हणजे संबंधित घरात कोणीही वास्तव्यास नसताना आणि स्मार्ट मीटरमध्ये अत्यल्प वापर दिसत असतानाही एवढ्या प्रचंड रकमेचे बिल कसे आले, याचे समाधानकारक उत्तर महावितरणाकडून मिळत नसल्याची तक्रार ग्राहकाने केली आहे.
सदर ग्राहकाचे नाव दामू महादेव कोळी असून त्यांना जून 2026 महिन्याचे 12 हजार 750 रुपयांचे वीजबिल प्राप्त झाले आहे.
बिलामध्ये चालू महिन्याचा वापर 228 युनिट दाखविण्यात आला असला तरी ग्राहकाच्या म्हणण्यानुसार प्रत्यक्ष स्मार्ट मीटरवरील नोंद आणि घरातील वापर यामध्ये मोठी तफावत आहे. नव्याने बसविण्यात आलेल्या स्मार्ट मीटरमध्ये अवघ्या 39 युनिट वापराची स्थिती असताना हजारो रुपयांचे बिल आकारण्यात आल्याने ग्राहक संभ्रमात पडला आहे.
याप्रकरणी ग्राहकाने महावितरण कार्यालयात वारंवार तक्रार नोंदवूनही अधिकाऱ्यांकडून ठोस कार्यवाही करण्यात आलेली नाही. उलट संबंधित मीटर क्रमांक किंवा ग्राहक नोंदीमध्ये तांत्रिक चूक झाल्यामुळे दुसऱ्या ग्राहकाचे बिल या ग्राहकाच्या नावावर आले असण्याची शक्यता असल्याचे मौखिक स्पष्टीकरण देण्यात येत असल्याचा आरोप आहे. मात्र चूक महावितरणाची असताना त्याचा फटका सामान्य ग्राहकाला बसत असून त्याला कार्यालयाच्या वारंवार फेऱ्या माराव्या लागत आहेत.
स्मार्ट मीटर प्रणाली लागू करताना वीज वापराची अचूक नोंद, तत्काळ माहिती आणि पारदर्शक बिलिंग यांची हमी देण्यात आली होती. मात्र धाराशिवमध्ये घडलेल्या या प्रकारामुळे स्मार्ट मीटर प्रणालीच्या विश्वासार्हतेवरच प्रश्न उपस्थित होत आहेत. ग्राहकांना आधुनिक तंत्रज्ञानाच्या नावाखाली त्रासच सहन करावा लागत असेल तर अशा व्यवस्थेचा नेमका उपयोग काय, असा सवाल नागरिक उपस्थित करीत आहेत.
धाराशिव शहरात गेल्या काही महिन्यांत चुकीची वीजबिले, वाढीव आकारणी, मीटर रीडिंगमधील विसंगती आणि ग्राहकांच्या तक्रारींकडे होणारे दुर्लक्ष याबाबत अनेक तक्रारी समोर येत आहेत. मात्र महावितरण प्रशासन या गंभीर बाबींकडे आवश्यक ती तत्परता दाखवत नसल्याचा आरोप होत आहे. त्यामुळे ग्राहकांचा संताप दिवसेंदिवस वाढत चालला आहे.
विशेष म्हणजे संबंधित ग्राहक परगावी वास्तव्यास असून घर बहुतांश काळ बंद असते. अशा परिस्थितीत हजारो रुपयांचा वीज वापर दाखविला जाणे ही बाब संशयास्पद मानली जात आहे. बिलातील आकडेवारी, मीटरवरील प्रत्यक्ष वापर आणि घरातील वास्तव परिस्थिती यामध्ये मोठी दरी असल्याने या प्रकरणाची स्वतंत्र चौकशी करण्याची मागणी होत आहे.
महावितरणाने या प्रकरणाची तातडीने चौकशी करून चुकीचे बिल रद्द करावे, संबंधित तांत्रिक त्रुटी शोधून जबाबदार अधिकाऱ्यांवर कारवाई करावी आणि ग्राहकाला न्याय द्यावा, अशी मागणी नागरिकांकडून होत आहे. अन्यथा अशा प्रकारच्या घटनांमुळे महावितरणावरील जनतेचा विश्वास आणखी कमी होण्याची भीती व्यक्त केली जात आहे.
दरम्यान, “चूक महावितरणाची आणि शिक्षा ग्राहकाला” अशी भावना नागरिकांमध्ये निर्माण झाली असून, धाराशिवमधील या प्रकरणामुळे महावितरणाच्या बिलिंग व्यवस्थेचा बोजवारा उडाल्याची चर्चा शहरभर सुरू आहे. ग्राहकांच्या तक्रारींना वेळेत प्रतिसाद देऊन पारदर्शक कारभार करण्याऐवजी दिरंगाई आणि हलगर्जीपणा केल्यास अशा घटनांमुळे महावितरणची प्रतिमा अधिकच मलिन होणार असल्याचे मत नागरिक व्यक्त करीत आहेत.
लोकविचार सत्य शोधून लिहिण्याची ताकद संपादक अमजद सय्यद 8390088786
