धाराशिव शहर पोलिसांची मोठी कारवाई! अवैध पिस्टलसह दोन जण जेरबंद; देशी बनावटीचे शस्त्र व जिवंत काडतुसे जप्त
बेंबळी टी-पॉईंट परिसरात सापळा रचून कारवाई; गुन्हेगारीला लगाम घालण्याच्या मोहिमेचे नागरिकांकडून स्वागत
धाराशिव लोकविचार
धाराशिव शहर पोलिसांनी अवैध शस्त्रास्त्रांविरोधात मोठी कारवाई करत देशी बनावटीची पिस्टल आणि जिवंत काडतुसे बाळगणाऱ्या दोन आरोपींना जेरबंद केले आहे. या कारवाईमुळे शहर व परिसरातील अवैध शस्त्र बाळगणाऱ्यांमध्ये खळबळ उडाली असून, धाराशिव शहर पोलिसांच्या सतर्कतेचे नागरिकांकडून कौतुक होत आहे.पोलीस अधीक्षक रितू खोखर, अप्पर पोलीस अधीक्षक शफकत आमना, उप विभागीय पोलिस अधिकारी सुरेशकुमार राऊत यांच्या मार्गदर्शनाखाली धाराशिव शहर पोलीस निरीक्षक कुमार दराडे यांच्या पथकाने ही कारवाई केली.याबाबत मिळालेल्या माहितीनुसार, दि. ९ मे २०२६ रोजी सायंकाळी अंदाजे ५ ते ५.३० वाजण्याच्या सुमारास बेंबळी टी-पॉईंट ते रुईभर दरम्यान ही कारवाई करण्यात आली. या प्रकरणी धाराशिव शहर पोलीस ठाण्यात गुरनं 190/2026 अन्वये कलम 3, 25 शस्त्र अधिनियम तसेच कलम 135 मपोका अंतर्गत गुन्हा दाखल करण्यात आला आहे.या प्रकरणातील आरोपींमध्ये सुजित बापुराव मुंडे (वय 26, रा. उत्तमी कायापुर, ता. जि. धाराशिव, सध्या रा. माणिक चौक, धाराशिव) व विश्वजीत विजय अमृतराव (वय 32, रा. तुळजापूर, ता. तुळजापूर, जि. धाराशिव) यांचा समावेश आहे.पोलीसांनी आरोपींकडून अंदाजे ३० हजार रुपये किंमतीची स्टील सदृश्य धातूची सिल्वर रंगाची देशी बनावटीची पिस्टल, एक मॅगझिन तसेच १ हजार रुपये किंमतीची दोन जिवंत काडतुसे जप्त केली आहेत. जप्त करण्यात आलेल्या काडतुसांवर “KE 7.65” असा उल्लेख असल्याची माहिती सूत्रांकडून मिळाली आहे.श्रीमंत रामराव क्षीरसागर पोना/1871 यांनी दिलेल्या फिर्यादीनुसार गुन्हा दाखल करण्यात आला असून पुढील तपास पोलीस उप निरीक्षक संदीप ओहोळ हे करीत आहेत.पोलीस निरीक्षक दराडे यांच्या विशेष पथकाने केलेल्या या कारवाईमुळे शहरातील अवैध शस्त्र बाळगणाऱ्यांवर मोठा आळा बसण्याची शक्यता व्यक्त केली जात आहे. गुन्हेगारी प्रवृत्तीविरोधात धाराशिव शहर पोलिसांनी घेतलेल्या आक्रमक भूमिकेमुळे नागरिकांमध्ये सुरक्षिततेची भावना अधिक बळकट होत असल्याची प्रतिक्रिया व्यक्त होत आहे.
लोकविचार सत्य शोधून लिहिण्याची ताकद संपादक अमजद सय्यद 8390088786
