धाराशिव शहरात मोकाट जनावरांवर कारवाईचा इशारा! दोन दिवसांची मुदत; मालकांवर गुन्हा दाखल होणार
धाराशिव लोकविचार
धाराशिव शहरातील मुख्य रस्ते, चौक, सार्वजनिक ठिकाणे आणि बाजारपेठांमध्ये मोकाट जनावरांचा वावर वाढल्याने वाहतुकीस अडथळा निर्माण होत असून नागरिकांच्या जीवितास धोका निर्माण होत आहे. या पार्श्वभूमीवर धाराशिव नगरपरिषदेने जनावरांच्या मालकांना जाहीर नोटीस देत कडक कारवाईचा इशारा दिला आहे.
नगरपरिषदेच्या नोटीसीनुसार, महाराष्ट्र नगरपरिषद, नगरपंचायती व औद्योगिक नगरी अधिनियम, १९६५ मधील तरतुदींनुसार सार्वजनिक रस्त्यावर व जागांवर जनावरे मोकाट सोडणे हा कायदेशीर अपराध आहे. त्यामुळे जनावरांच्या मालकांनी आपली जनावरे स्वतःच्या खासगी जागेत अथवा गोठ्यात बांधून ठेवावीत, असे आवाहन करण्यात आले आहे.
नोटीसीनंतर दोन दिवसांच्या आत मोकाट जनावरांचा बंदोबस्त न केल्यास नगरपरिषदेच्या पथकाकडून जनावरे ताब्यात घेऊन कोंडवाड्यात अथवा गोठ्यात जमा करण्यात येणार आहेत. या कारवाईचा संपूर्ण खर्च संबंधित जनावरांच्या मालकांकडून वसूल केला जाणार आहे.
तसेच ताब्यात घेतलेली जनावरे सोडवून घेण्यासाठी दंडात्मक रक्कम आणि जनावरांच्या चारा-पाण्यासह संगोपनाचा संपूर्ण खर्च मालकांना भरावा लागणार आहे.
वारंवार जनावरे मोकाट सोडणाऱ्या मालकांविरुद्ध अधिनियमातील तरतुदींनुसार तसेच भारतीय न्याय संहिता (BNS) अंतर्गत कायदेशीर गुन्हे दाखल करण्यात येतील, असा स्पष्ट इशारा नगरपरिषदेने दिला आहे.
त्यामुळे जनावरांच्या मालकांनी प्रशासनाच्या कारवाईपूर्वीच जनावरे बांधून ठेवावीत, अन्यथा दंडात्मक व कायदेशीर कारवाईला सामोरे जावे लागणार आहे.
लोकविचार सत्य शोधून लिहिण्याची ताकद संपादक अमजद सय्यद 8390088786
