एस टी च्या NCMC कार्ड जादा दराने विक्रीवर कडक कारवाई; परवाने रद्द करण्याचे आदेश – प्रताप सरनाईक
मुंबई – लोकविचार
महाराष्ट्र राज्य मार्ग परिवहन महामंडळाच्या (एसटी) प्रवाशांसाठी सुरू करण्यात आलेल्या NCMC (National Common Mobility Card) स्मार्ट कार्ड योजनेत गैरप्रकार करणाऱ्यांवर आता प्रशासनाने कडक भूमिका घेतली आहे. सवलतधारक प्रवाशांकडून जादा दराने कार्ड विक्री करणाऱ्या विक्रेत्यांचे परवाने तात्काळ रद्द करण्याचे आदेश परिवहनमंत्री प्रताप सरनाईक यांनी दिले आहेत.राज्यभरात ३००० हून अधिक अधिकृत विक्रेत्यांमार्फत तसेच प्रत्येक आगार आणि प्रमुख बसस्थानकांवर NCMC कार्डचे वितरण सुरू आहे. शासनाने नवीन कार्डासाठी १९९ रुपये आणि आधीपासून स्मार्ट कार्ड असलेल्या प्रवाशांसाठी १४९ रुपये असा दर निश्चित केला आहे. मात्र, काही विक्रेत्यांकडून यापेक्षा जादा दर आकारल्याच्या तक्रारी समोर आल्याने प्रशासन सतर्क झाले आहे.या पार्श्वभूमीवर संबंधित विक्रेत्यांवर कारवाई सुरू करण्यात आली असून काहींचे परवाने रद्दही करण्यात आले आहेत. “प्रवाशांची फसवणूक कोणत्याही परिस्थितीत सहन केली जाणार नाही,” असा इशारा सरनाईक यांनी दिला आहे.दरम्यान, लवकरच सर्व सवलतधारक प्रवाशांसाठी एसटी प्रवासात NCMC कार्ड वापरणे अनिवार्य करण्याची तयारी सुरू आहे. यामुळे प्रवास अधिक सुलभ होणार असून सवलतींचा लाभ डिजिटल पद्धतीने अचूकपणे देणे शक्य होणार आहे.तसेच, कार्डद्वारे तिकीट वितरण, टॉप-अप आणि इतर व्यवहारांसाठी एकसंध मानक कार्यपद्धती (SOP) लागू करण्यात आली आहे. सर्व आगार व्यवस्थापकांना ही प्रणाली काटेकोरपणे राबवण्याचे निर्देश देण्यात आले असून प्रवाशांना कोणतीही अडचण येऊ नये यासाठी विशेष दक्षता घेण्याचे आदेशही देण्यात आले आहेत.या उपक्रमामुळे एसटी सेवा अधिक आधुनिक, पारदर्शक आणि प्रवासी-केंद्रित होण्याच्या दिशेने महत्त्वाचे पाऊल उचलले गेले आहे.
लोकविचार सत्य शोधून लिहिण्याची ताकद संपादक अमजद सय्यद 8390088786
