एसटीसाठी १७,४५० कंत्राटी चालक व सहाय्यकांची भरती; २ ऑक्टोबरपासून ई-निविदा प्रक्रिया सुरू – परिवहन मंत्री प्रताप सरनाईक
मुंबई दि.२१(प्रतिनिधी):महाराष्ट्र राज्य मार्ग परिवहन महामंडळाच्या (एसटी) सेवेला गती देण्यासाठी आणि भविष्यात येणाऱ्या ८ हजार नवीन बसेस चालविण्यासाठी आवश्यक असलेले मनुष्यबळ उपलब्ध करून देण्यासाठी मोठा निर्णय घेण्यात आला आहे. एसटी महामंडळात १७,४५० कंत्राटी चालक व सहाय्यक पदांची भरती प्रक्रिया राबविण्यात येणार असून येत्या २ ऑक्टोबरपासून ई-निविदा प्रक्रिया सुरू होणार आहे, अशी माहिती राज्याचे परिवहन मंत्री तथा एसटी महामंडळाचे अध्यक्ष प्रताप सरनाईक यांनी दिली.
ही भरती प्रक्रिया राबविल्यामुळे राज्यातील हजारो बेरोजगार तरुण-तरुणींना रोजगाराची सुवर्णसंधी उपलब्ध होणार आहे. प्रत्येक उमेदवाराला किमान ३० हजार रुपये वेतन मिळणार असल्याने रोजगार शोधणाऱ्या होतकरू तरुणांनी या संधीचा लाभ घ्यावा, असे आवाहन मंत्री सरनाईक यांनी केले.
महामंडळाच्या ३०० व्या संचालक मंडळ बैठकीत हा महत्त्वपूर्ण निर्णय घेण्यात आला. बससेवा सुरळीत ठेवण्यासाठी आवश्यक असलेले चालक व सहाय्यक मनुष्यबळ भाडेतत्त्वावर (कंत्राटी पद्धतीने) तीन वर्षांच्या कालावधीसाठी घेण्याचे ठरविण्यात आले आहे.
ही ई-निविदा प्रक्रिया राज्यातील सहा प्रादेशिक विभागनिहाय राबविण्यात येणार आहे. त्यामुळे प्रादेशिक पातळीवर हजारो युवक-युवतींना रोजगाराच्या संधी उपलब्ध होणार आहेत.
या भरतीमुळे एकीकडे एसटीच्या वाढत्या सेवा गरजा पूर्ण होतील तर दुसरीकडे राज्यातील बेरोजगारी समस्येवर दिलासा मिळेल, अशी अपेक्षा व्यक्त केली जात आहे.
लोकमदत न्यूज “सत्य शोधून लिहिण्याची ताकद”
संपादक अमजद सय्यद 8390088786
