एसटीला आर्थिक बळकटी देण्यासाठी बहुआयामी योजना ५०० कोटींचे अतिरिक्त उत्पन्नाचे लक्ष्य – प्रताप सरनाईक
डिझेल खरेदीत २४१ कोटींची बचत, इंधन पंप व जाहिरातींमधून महसूल वाढ सौर ऊर्जा व AI चा वापर करून खर्च नियंत्रणावर भर
मुंबई | लोकमदत न्यूज
महाराष्ट्र राज्य मार्ग परिवहन महामंडळ (एसटी) ची आर्थिक स्थिती सक्षम करण्यासाठी परिवहन मंत्री प्रताप सरनाईक यांनी बहुआयामी उपाययोजना राबवण्याचे निर्देश दिले आहेत. आज पार पडलेल्या बैठकीत महसूल वाढ व खर्च नियंत्रण या दोन्ही आघाड्यांवर ठोस आणि दूरदृष्टीपूर्ण निर्णय घेण्यात आल्याचे त्यांनी स्पष्ट केले.
सरनाईक यांनी सांगितले की, डिझेल खरेदी प्रक्रियेत पारदर्शकता आणत स्पर्धात्मक निविदा प्रणाली लागू करण्यात आली आहे. यामुळे कोणताही हस्तक्षेप न होता अधिक सवलतीत डिझेल खरेदी शक्य झाली असून दरवर्षी सुमारे २४१ कोटी रुपयांची बचत होणार आहे.
महसूल वाढीसाठी एसटी आता इंधन विक्री क्षेत्रातही उतरणार आहे. सार्वजनिक-खाजगी भागीदारी (PPP) तत्त्वावर राज्यभरात १०० ते ११० ठिकाणी मल्टी-मोडल इंधन पंप उभारले जात आहेत. या उपक्रमातून दरवर्षी सुमारे १०० कोटी रुपयांचे उत्पन्न अपेक्षित असून धुळे येथे असा प्रकल्प आधीच सुरू करण्यात आला आहे.
जाहिरात महसूल वाढवण्यावरही महामंडळाचा भर आहे. राज्यातील २५१ आगार व ६०० हून अधिक बसस्थानकांमधून दररोज ५० ते ५५ लाख प्रवाशांपर्यंत पोहोचणाऱ्या एसटी नेटवर्कचा प्रभावी वापर करून पुढील पाच वर्षांत सुमारे २५० कोटी रुपयांचे उत्पन्न मिळवण्याचा आराखडा तयार करण्यात आला आहे. यापूर्वी हे उत्पन्न केवळ २० ते २२ कोटी रुपयांपर्यंत मर्यादित होते.
ऊर्जा बचतीसाठी सौर रूफटॉप प्रकल्प हाती घेण्यात आले असून, एसटीच्या मोकळ्या जागांवर सौर शेतीद्वारे वीज निर्मिती करून ती महावितरण कंपनीला विकण्याची योजना आहे. यामुळे दीर्घकालीन शाश्वत उत्पन्नाचा स्रोत निर्माण होणार आहे.
याशिवाय, स्क्रॅपिंग प्रकल्प, चालक-वाहकांच्या ड्युटी व्यवस्थापनात कृत्रिम बुद्धिमत्तेचा वापर करून अतिकालीन भत्त्यावर नियंत्रण, तसेच इतर उपाययोजनांद्वारे येत्या आर्थिक वर्षात किमान ५०० कोटी रुपयांचे अतिरिक्त उत्पन्न मिळवण्याचे उद्दिष्ट ठेवण्यात आले आहे.
एसटीमध्ये आर्थिक शिस्त, पारदर्शकता आणि स्वावलंबन वाढवणे हेच प्रमुख ध्येय असल्याचे सांगत, या सर्व उपाययोजनांची कठोर अंमलबजावणी केली जाईल, असा विश्वास परिवहन मंत्री सरनाईक यांनी व्यक्त केला.
लोकमदत न्यूज सत्य शोधून लिहिण्याची ताकद संपादक अमजद सय्यद 8390088786
