तुळजापूर उपजिल्हा रुग्णालयातील रिक्त पदे लवकरच भरणार! मंत्री प्रकाश आबिटकर यांची अमोल जाधवांना ग्वाही
तुळजापूर लोकविचार
तुळजापूर उपजिल्हा रुग्णालयातील विविध रिक्त पदांचा प्रश्न मार्गी लागण्याची चिन्हे दिसू लागली आहेत. शिवसेनेचे माजी तुळजापूर तालुकाप्रमुख अमोल जाधव यांनी बुधवारी मुंबई येथील मंत्रालयात सार्वजनिक आरोग्य मंत्री प्रकाश आबिटकर यांची भेट घेऊन तुळजापूर उपजिल्हा रुग्णालयातील रिक्त पदे तातडीने भरण्याची मागणी केली.
यापूर्वी सुमारे आठ दिवसांपूर्वी अमोल जाधव यांनी मंत्री आबिटकर यांना निवेदन देत तुळजापूर उपजिल्हा रुग्णालयातील विविध अधिकारी व कर्मचाऱ्यांची पदे दीर्घकाळापासून रिक्त असल्याने रुग्णसेवेवर त्याचा विपरीत परिणाम होत असल्याचे निदर्शनास आणून दिले होते. तसेच नागरिकांना वेळेत आणि दर्जेदार आरोग्य सुविधा मिळण्यासाठी रिक्त पदांवर तातडीने नियुक्त्या करण्याची मागणी केली होती.
या निवेदनाच्या अनुषंगाने आज मंत्रालयात झालेल्या बैठकीत अमोल जाधव यांनी पुन्हा एकदा हा विषय मंत्री आबिटकर यांच्या निदर्शनास आणून दिला. यावेळी झालेल्या सकारात्मक चर्चेनंतर सार्वजनिक आरोग्य मंत्री प्रकाश आबिटकर यांनी पुढील आठ दिवसांच्या आत तुळजापूर उपजिल्हा रुग्णालयातील रिक्त असलेल्या विविध अधिकाऱ्यांच्या पदांवर नियुक्ती करण्याची प्रक्रिया पूर्ण केली जाईल, असे आश्वासन दिल्याची माहिती अमोल जाधव यांनी दिली.
या आश्वासनामुळे तुळजापूर शहरासह तालुक्यातील नागरिकांमध्ये समाधानाचे वातावरण असून, अनेक दिवसांपासून रिक्त असलेली पदे भरली गेल्यास रुग्णालयातील आरोग्य सेवा अधिक सक्षम आणि प्रभावी होण्याची अपेक्षा व्यक्त केली जात आहे.
दरम्यान, मंत्री स्तरावर सकारात्मक आश्वासन मिळाल्याने येत्या काही दिवसांत तुळजापूर उपजिल्हा रुग्णालयातील विविध रिक्त पदांवर अधिकारी व कर्मचाऱ्यांच्या नियुक्त्या होण्याची दाट शक्यता वर्तवली जात आहे. नियुक्त्या झाल्यास रुग्णालयातील कामकाजाला गती मिळून रुग्णांना अधिक चांगल्या आरोग्य सुविधा उपलब्ध होतील, अशी अपेक्षा व्यक्त केली जात आहे.
Lokvichar – लोकविचार सत्य शोधून लिहिण्याची ताकद संपादक अमजद सय्यद 083900 88786
