भव्य महाआरोग्य शिबिराला नागरिकांचा उत्स्फूर्त प्रतिसाद…दरवर्षी शिबिर भरविण्याचा मानस – मल्हार पाटील
धाराशिव लोकविचार
महाराष्ट्राचे लोकनेते स्व. अजितदादा पवार यांच्या जयंतीनिमित्त तसेच मुख्यमंत्री देवेंद्र फडणवीस यांच्या वाढदिवसानिमित्त धाराशिव येथे आयोजित करण्यात आलेल्या भव्य महाआरोग्य शिबिराला नागरिकांचा उत्स्फूर्त प्रतिसाद लाभला. शासकीय वैद्यकीय महाविद्यालय, धाराशिव आणि तेरणा वैद्यकीय महाविद्यालय, नेरुळ यांच्या संयुक्त विद्यमाने, आमदार राणाजगजितसिंह पाटील यांच्या मार्गदर्शनाखाली भारतीय जनता पार्टी, जिल्हा धाराशिव यांच्या वतीने आयोजित या महाआरोग्य शिबिराचे उद्घाटन मल्हार पाटील यांच्या हस्ते मान्यवरांच्या उपस्थितीत करण्यात आले.
यावेळी बोलताना मल्हार पाटील यांनी सांगितले की, समाजातील प्रत्येक गरजू नागरिकापर्यंत दर्जेदार आरोग्यसेवा पोहोचविण्याच्या उद्देशाने या महाआरोग्य शिबिराचे आयोजन करण्यात आले आहे. शिबिरामध्ये विविध आजारांवरील तज्ज्ञ डॉक्टरांकडून तपासणी, वैद्यकीय सल्ला, औषधोपचार तसेच आवश्यक असल्यास पुढील उपचारांची सुविधा उपलब्ध करून देण्यात येत आहे. गंभीर आजाराने ग्रस्त असलेल्या गरजू रुग्णांवर तेरणा हॉस्पिटल, नेरुळ येथे मोफत उपचार करण्यात येणार असल्याची माहिती त्यांनी दिली.
कन्या शाळा मल्टिपर्पज मैदान धाराशिव येथे सुरू असलेल्या या महाआरोग्य शिबिरात सकाळपासूनच नागरिकांनी मोठ्या संख्येने उपस्थिती लावत आरोग्य तपासणी करून घेतली. पावसाचे वातावरण असतानाही ज्येष्ठ नागरिक, महिला, दिव्यांग तसेच ग्रामीण भागातील अनेक नागरिकांनी शिबिराचा लाभ घेतला. पहिल्याच वर्षी मिळालेल्या उत्स्फूर्त प्रतिसादामुळे असे महाआरोग्य शिबिर दरवर्षी आयोजित करण्याचा मानस मल्हार पाटील यांनी व्यक्त केला.
तत्पूर्वी स्व. अजितदादा पवार यांच्या जयंतीनिमित्त त्यांच्या प्रतिमेचे पूजन करून अभिवादन करण्यात आले. तसेच रक्तदान शिबिराचेही आयोजन करण्यात आले होते. या रक्तदान उपक्रमात अनेक युवकांनी उत्स्फूर्त सहभाग नोंदविला. विशेष म्हणजे मल्हार राणाजगजितसिंह पाटील यांनी स्वतः रक्तदान करून सामाजिक बांधिलकीचा आदर्श घालून दिला.
धाराशिव जिल्ह्यातील सर्व गरजू नागरिकांनी, महिला, ज्येष्ठ नागरिक तसेच विविध आजारांनी त्रस्त असलेल्या रुग्णांनी या सुवर्णसंधीचा लाभ घेऊन आपल्या आरोग्याची तपासणी करून घ्यावी, असे आवाहनही मल्हार पाटील यांनी केले.
या कार्यक्रमास भाजपा जिल्हाध्यक्ष दत्ताभाऊ कुलकर्णी, नितीन काळे, नगराध्यक्षा सौ. नेहाताई राहुल काकडे, तेरणा ट्रस्टचे विश्वस्त अशोकभाऊ शिंदे, विजेंद्र अण्णा चव्हाण, सतीश दंडनाईक, देशमुख सर, अनिल काळे, खंडेराव चौरे, संपतराव डोके, नितीन भोसले, पंचायत समिती सभापती सौ. गोकर्णाताई कदम, उपनगराध्यक्ष अक्षय ढोबळे, नगर परिषद बांधकाम सभापती अभिजीत काकडे, शिक्षण सभापती प्रवीण माळी, नियोजन समिती सभापती आकाश तावडे, पाणीपुरवठा सभापती विलास लोंढे,भारतीय जनता पक्ष युवा मोर्चा जिल्हाध्यक्ष तथा नगरसेवक राहुल काकडे,नगरसेवक सिद्धार्थ बनसोडे,धनंजय पाटील, सुशांत सोनवणे यांच्यासह तेरणा वैद्यकीय महाविद्यालय व शासकीय वैद्यकीय महाविद्यालयातील वैद्यकीय अधिकारी, तज्ज्ञ डॉक्टर, भाजपचे पदाधिकारी, नगरसेवक, कार्यकर्ते आणि जिल्हाभरातून आलेले असंख्य नागरिक मोठ्या संख्येने उपस्थित होते.
लोकविचार सत्य शोधून लिहिण्याची ताकद संपादक अमजद सय्यद 083900 88786
