ध्वनीप्रदूषणाविरोधात आनंदनगर पोलिसांची धडक कारवाई; आदेश धाब्यावर बसवणाऱ्या डॉल्बी चालकांवर गुन्हे दाखल
धाराशिव लोकविचार
छत्रपती संभाजी महाराज जयंती मिरवणुकीदरम्यान ध्वनीप्रदूषणाच्या नियमांचे उल्लंघन करून कर्णकर्कश आवाजात डॉल्बी सिस्टीम वाजविणाऱ्या संबंधित आयोजक व डीजे चालकांविरोधात आनंदनगर पोलीस ठाण्याने कठोर कारवाई करत गुन्हे दाखल केले आहेत.या धाडसी आणि जनहिताच्या कारवाईमुळे आनंदनगर पोलिसांच्या कार्यपद्धतीचे नागरिकांकडून कौतुक होत असून, कायद्याचे उल्लंघन करणाऱ्यांवर कोणतीही गय केली जाणार नसल्याचा स्पष्ट संदेश पोलिस प्रशासनाने दिला आहे.
दि. १४ मे २०२६ रोजी सायंकाळी ५.३० ते रात्री १० वाजेच्या सुमारास धाराशिव शहरातील छत्रपती संभाजी महाराज जयंती मिरवणुकीमध्ये काही डॉल्बी सिस्टीम चालकांनी पोलीस प्रशासनाने दिलेल्या सूचनांकडे दुर्लक्ष करून वाहनांवर टॉप व बस डॉल्बी साउंड सिस्टीम लावून अत्यंत तीव्र व कर्णकर्कश आवाजात ध्वनीप्रक्षेपण केले. यामुळे ध्वनीप्रदूषण नियमांचा भंग झाला तसेच नागरिकांना मोठा त्रास सहन करावा लागला.
या प्रकरणी आरोपीत तिरुपती रामेश्वर उघडे (रा. शिक्षक कॉलनी, धाराशिव), झेड ऑडिओ कळंब येथील डीजे ऑपरेटर साहिल सखाराम भुंडे (रा. बावधन, पुणे), ओंकार भानुदास वाघमारे (रा. रामनगर, धाराशिव), के. पिंपरी चिंचवड पुणे येथील डीजे ऑपरेटर चैतन्य रामदास काळोखे (रा. देवगाव रोड, पिंपरी चिंचवड), तसेच आयुष अनिल तोडकरी (रा. मारवाड गल्ली, धाराशिव) आणि ए.के.जी. कर्वेनगर पुणे येथील डीजे ऑपरेटर अभिषेक युवराज डांगे (रा. झुंजार मित्र मंडळ, कर्वेनगर, पुणे) यांच्याविरुद्ध गुन्हे दाखल करण्यात आले आहेत.
सदर आरोपींविरोधात भारतीय दंड विधान संहिता कलम २२३, २८९, २९२, २९३ तसेच पर्यावरण संरक्षण अधिनियम कलम ३ व १५ आणि ध्वनीप्रदूषण (नियमन व नियंत्रण) नियम २००० अंतर्गत कलम ३, ४, ५, ६ अन्वये आनंदनगर पोलीस ठाण्यात गुन्हा नोंद करण्यात आला आहे.
ही कारवाई पोलीस अधीक्षक रितू खोखर, अप्पर पोलीस अधीक्षक शफकत आमना, उपविभागीय पोलीस अधिकारी सुरेशकुमार राऊत यांच्या मार्गदर्शनाखाली आनंदनगर पोलीस ठाण्याचे पोलीस निरीक्षक रवींद्र खांडेकर व त्यांच्या पथकाने केली. कायदा व सुव्यवस्था अबाधित ठेवण्यासाठी तसेच नागरिकांना ध्वनीप्रदूषणापासून दिलासा देण्यासाठी पोलिसांनी घेतलेल्या या कठोर भूमिकेचे सर्व स्तरांतून स्वागत होत आहे.
लोकविचार सत्य शोधून लिहिण्याची ताकद संपादक अमजद सय्यद 8390088786
