आमदार राणाजगजितसिंह पाटील यांच्या हस्ते नवनिर्वाचित सभापती-उपसभापतींचा सत्कार धाराशिव पंचायत समितीत भाजप महायुतीचा जल्लोष
धाराशिव | लोकमदत न्यूज
धाराशिव पंचायत समिती निवडणुकीत भारतीय जनता पार्टी महायुतीला मिळालेल्या घवघवीत यशानंतर सभापती व उपसभापती पदांच्या निवडी आज उत्साहपूर्ण वातावरणात पार पडल्या. निवड प्रक्रियेनंतर नवनिर्वाचित पदाधिकाऱ्यांचा आमदार राणाजगजितसिंह पाटील यांच्या हस्ते सत्कार करून अभिनंदन करण्यात आले.
या निवडीत सभापतीपदी सौ. गोकर्णा गोपाळ कदम (वानेवाडी) तर उपसभापतीपदी प्रमोद पाटील (वडगाव सि.) यांची निवड झाली. निवड झाल्यानंतर आमदार राणाजगजितसिंह पाटील यांनी दोघांचा सत्कार करून त्यांना पुढील कार्यकाळासाठी शुभेच्छा दिल्या.
यावेळी बोलताना आमदार पाटील म्हणाले की, गेल्या अनेक वर्षांपासून आदरणीय डॉ. पद्मसिंहजी पाटील यांच्या मार्गदर्शनाखाली धाराशिव पंचायत समितीत विकास, पारदर्शकता आणि जनसेवेची समृद्ध परंपरा जपली गेली आहे. यावेळीही ती परंपरा कायम राखत भाजप महायुतीने मिळवलेले हे यश तालुक्याच्या विकासाला नवी दिशा देणारे ठरेल. नव्या नेतृत्वाच्या माध्यमातून ग्रामीण भागातील विकासकामांना अधिक गती मिळेल तसेच जनतेच्या अपेक्षा पूर्ण करण्यासाठी लोकाभिमुख आणि प्रभावी कामगिरी घडेल, असा विश्वास त्यांनी व्यक्त केला.
यावेळी पंचायत समिती निवडणुकीत विजयी झालेल्या भाजपा महायुतीच्या सर्व नवनिर्वाचित सदस्यांचाही सत्कार करून त्यांचे अभिनंदन करण्यात आले.
या कार्यक्रमास भाजपा जिल्हाध्यक्ष दत्ताभाऊ कुलकर्णी, सुरेशभाऊ देशमुख, सुनील चव्हाण, नेताजी पाटील यांच्यासह तालुक्यातील प्रमुख पदाधिकारी, पंचायत समिती सदस्य आणि कार्यकर्ते मोठ्या संख्येने उपस्थित होते.
