येडशीतील युवक शेतकरी दगडू देशमुख यांचा भरदिवसा खून; येडशी–सोनेगाव रस्त्यावर मृतदेह आढळला, डॉग स्कॉड व फॉरेन्सिक पथकाकडून तपास सुरू

येडशीतील युवक शेतकरी दगडू देशमुख यांचा भरदिवसा खून; येडशी–सोनेगाव रस्त्यावर मृतदेह आढळला, डॉग स्कॉड व फॉरेन्सिक पथकाकडून तपास सुरू

धाराशिव लोकविचार

धाराशिव तालुक्यातील येडशी येथे रविवारी घडलेल्या खळबळजनक घटनेने संपूर्ण परिसर हादरला आहे. येडशी येथील युवक शेतकरी दगडू बाबासाहेब देशमुख (वय अंदाजे ३०) यांचा अज्ञातांनी खून केल्याची घटना समोर आली आहे. त्यांचा मृतदेह येडशी–सोनेगाव रस्त्याच्या कडेला आढळून आल्याने परिसरात भीतीचे वातावरण निर्माण झाले असून खूनामागील नेमके कारण अद्याप स्पष्ट झालेले नाही.घटनेची माहिती मिळताच ग्रामीण पोलिसांनी तातडीने घटनास्थळी धाव घेत तपासाची सूत्रे हाती घेतली.

पुरावे संकलित करण्यासाठी डॉग स्कॉड आणि फॉरेन्सिक पथक घटनास्थळी दाखल झाले असून विविध अंगांनी तपास सुरू आहे.प्राथमिक माहितीनुसार, दगडू देशमुख हे मोटारसायकलवरून आपल्या गावी जात असताना अज्ञात व्यक्तींनी त्यांचा पाठलाग करून त्यांच्यावर हल्ला केल्याचा प्राथमिक अंदाज व्यक्त केला जात आहे.

मात्र, खून नेमका कोणत्या कारणातून झाला, त्यामागे वैयक्तिक वाद, जुने वैर की अन्य काही कारण आहे, याबाबत अद्याप कोणतीही अधिकृत माहिती समोर आलेली नाही.तपासादरम्यान देशमुख यांच्या हालचालींचा मागोवा घेतला जात असून, खून होण्यापूर्वी त्यांचा कोणाशी संपर्क झाला होता का, ते कोणासोबत प्रवास करत होते का, त्यांच्या मोबाईलवरील कॉल रेकॉर्ड, संदेश तसेच अन्य तांत्रिक बाबींचीही पडताळणी केली जात आहे.

परिसरातील सीसीटीव्ही फुटेज, प्रत्यक्षदर्शी साक्षीदार आणि घटनास्थळावरील भौतिक पुराव्यांच्या आधारे तपासाची दिशा निश्चित करण्याचे काम सुरू आहे.

घटनास्थळी ग्रामीण पोलीस ठाण्याचे पोलीस निरीक्षक वासुदेव मोरे, पोलिस उपनिरीक्षक संदीप ओहाळ तसेच आरसेवाड, सावंत, भांगे, पडवळ, चिलवंत आणि इतर पोलिस कर्मचाऱ्यांनी पाहणी करून तपास सुरू केला आहे.या खूनप्रकरणामुळे येडशीसह परिसरात मोठी खळबळ उडाली असून नागरिकांमध्ये भीतीचे वातावरण आहे. पोलिसांनी आरोपींचा शोध घेण्यासाठी तपास वेगाने सुरू केला असून, लवकरच या गुन्ह्याचा उलगडा होईल, असा विश्वास व्यक्त केला जात आहे.

Lokvichar – लोकविचार सत्य शोधून लिहिण्याची ताकद संपादक अमजद सय्यद 083900 88786