“विठूरायाच्या दर्शनाने मनाला नवी ऊर्जा” : आ. प्रा. डॉ. तानाजीराव सावंत यांचे पंढरपुरात सहकुटुंब विठ्ठल-रुक्मिणी दर्शन
पंढरपूर लोकविचार
महाराष्ट्र राज्याचे माजी आरोग्यमंत्री तथा भूम-परंडा-वाशी विधानसभा मतदारसंघाचे आमदार प्रा. डॉ. तानाजीराव सावंत यांनी तीर्थक्षेत्र पंढरपूर येथे सहकुटुंब श्री विठ्ठल-रुक्मिणीचे मनोभावे दर्शन घेतले. पंढरीच्या पावन भूमीत विठूरायाच्या सावळ्या रूपाचे दर्शन घेतल्याने मनाला एक वेगळी शांती लाभली असून जनतेच्या सेवेसाठी नव्या उर्जेची प्रेरणा मिळाल्याची भावना त्यांनी यावेळी व्यक्त केली.विठ्ठल नामाच्या जयघोषाने दुमदुमलेल्या भक्तिमय वातावरणात डॉ. तानाजीराव सावंत यांनी चिरंजीव ऋषीराज सावंत तसेच पुतणे अनिल दादा सावंत यांच्यासह श्री विठ्ठलाच्या चरणी नतमस्तक होत आशीर्वाद घेतले.
मंदिर परिसरात मोठ्या भक्तिभावाने दर्शन घेताना त्यांनी राज्यातील जनतेच्या सुख, समृद्धी आणि भरभराटीसाठी विठ्ठल चरणी प्रार्थना केली.पंढरपूर हे महाराष्ट्राच्या वारकरी संप्रदायाचे श्रद्धास्थान मानले जाते. अशा पवित्र स्थळी दर्शन घेताना आ. सावंत यांनी विठ्ठल भक्तीमुळे समाजसेवेची प्रेरणा अधिक बळकट होत असल्याचे सांगितले.
यावेळी मंदिर संस्थानाच्या वतीने त्यांचे स्वागत केले.“विठ्ठलाचे दर्शन हे केवळ अध्यात्मिक समाधान देणारे नसून जनतेसाठी अधिक जोमाने कार्य करण्याची प्रेरणा देणारे आहे,” असेही आ.तानाजीराव सावंत यांनी यावेळी नमूद केले.
