प्रवाशांच्या सेवेसाठी परिवहन मंत्री सरनाईक यांची थेट महामार्गावरील हॉटेलमध्ये जाऊन केली पाहणी
एसटी प्रवाशांच्या सुविधा, खाद्यपदार्थांचा दर्जा तपासला; सुरक्षित व सुखकर प्रवासासाठी कटिबद्धतेची ग्वाही
धाराशिव | लोकविचार
राज्याचे परिवहन मंत्री तथा धाराशिव जिल्ह्याचे पालकमंत्री प्रतापराव सरनाईक यांनी आज धाराशिव दौऱ्यादरम्यान एसटी महामंडळाच्या बसेस महामार्गावर अल्प विश्रांतीसाठी थांबत असलेल्या विविध हॉटेल्स व उपहारगृहांना अचानक भेट देत प्रवाशांना उपलब्ध करून दिल्या जाणाऱ्या सोयी-सुविधांची प्रत्यक्ष पाहणी केली.या पाहणीदरम्यान मंत्री सरनाईक यांनी प्रवाशांसाठी स्वच्छता, आसनव्यवस्था, पिण्याचे पाणी, स्वच्छतागृहे तसेच खाद्यपदार्थांचा दर्जा यांची बारकाईने तपासणी केली. प्रवाशांना दर्जेदार व सुरक्षित सुविधा मिळत आहेत का, याची खात्री करून घेत त्यांनी संबंधित व्यवस्थापनाला आवश्यक सूचना दिल्या.यावेळी मंत्री सरनाईक यांनी एसटी प्रवाशांशी थेट संवाद साधत त्यांच्या अडचणी, समस्या व अपेक्षा जाणून घेतल्या. प्रवाशांच्या प्रतिक्रियांना महत्त्व देत त्यांनी सेवा अधिक सुधारण्यासाठी प्रयत्नशील राहण्याचे आश्वासन दिले. विशेष म्हणजे, अनेक प्रवाशांनी या उपहारगृहांमध्ये मिळणाऱ्या सुविधा व सेवांबद्दल समाधान व्यक्त केले.“एसटी महामंडळाच्या प्रवाशांना उत्तम सुविधा, सुरक्षितता आणि दर्जेदार सेवा मिळणे ही शासनाची प्राथमिकता आहे. प्रवाशांचा प्रवास अधिक सुखकर आणि विश्वासार्ह व्हावा यासाठी आम्ही पूर्णपणे कटिबद्ध आहोत,” असे प्रतिपादन परिवहन मंत्री प्रतापराव सरनाईक यांनी यावेळी केले.पालकमंत्री सरनाईक यांच्या या प्रत्यक्ष पाहणीमुळे एसटी प्रवाशांच्या सेवेसाठी शासन गंभीर असून प्रवाशांच्या हिताला सर्वोच्च प्राधान्य दिले जात असल्याचा सकारात्मक संदेश नागरिकांमध्ये पोहोचला आहे. त्यांच्या या सक्रिय भूमिकेचे प्रवासी व स्थानिकांकडून स्वागत होत आहे.
लोकविचार सत्य शोधून लिहिण्याची ताकद संपादक अमजद सय्यद 8390088786
