भातागळीत मशाल धगधगली! खासदार ओमराजे निंबाळकर व आमदार प्रवीण स्वामींच्या उपस्थितीत निवडणुकीचे रणशिंग शिवसैनिकांचा मोठा निर्धार
आगामी जिल्हा परिषद व पंचायत समिती निवडणूक २०२६ च्या पार्श्वभूमीवर आज भातागळी (ता. लोहारा) येथे शिवसेना (उद्धव बाळासाहेब ठाकरे) पक्षाच्या अधिकृत उमेदवारांच्या प्रचारार्थ भव्य जाहीर सभा पार पडली. या सभेच्या माध्यमातून खासदार ओमराजे निंबाळकर आणि आमदार श्री प्रवीण स्वामी यांनी मतदारांशी थेट संवाद साधत विजयाचा निर्धार व्यक्त केला.
काणेगाव जिल्हा परिषद सर्कलच्या उमेदवार सौ. प्रतिभा श्रीकांत कदम, काणेगाव पंचायत समिती गणाचे उमेदवार श्री. अनिल राम मोरे तसेच भातागळी गणाचे उमेदवार श्री. विनायक पंडित बारगळ यांच्या प्रचारार्थ या सभेचे आयोजन करण्यात आले होते.
विकासाची भूमिका: ग्रामीण भागाच्या सर्वांगीण विकासाची दिशा स्पष्ट करत, शेतकरी, महिला आणि तरुणांच्या मूलभूत प्रश्नांवर खासदारांनी सविस्तर मार्गदर्शन केले.
जनतेचा विश्वास: शिवसेना (उद्धव बाळासाहेब ठाकरे) पक्ष हा केवळ सत्तेसाठी नव्हे, तर जनतेच्या विश्वासावर आणि हक्कासाठी लढणारा पक्ष असल्याचे मत यावेळी व्यक्त करण्यात आले.
तिन्ही उमेदवारांनी जनतेशी संवाद साधताना ‘प्रामाणिक सेवा, पारदर्शक कारभार आणि लोकहितासाठी कटिबद्ध’ राहण्याची शपथ घेतली.
यावेळी खासदार ओमराजे निंबाळकर यांनी मार्गदर्शन करताना सांगितले की, “शिवसेना नेहमीच अन्यायाविरुद्ध आणि विकासाच्या बाजूने उभी राहिली आहे. ग्रामीण भागातील प्रश्न मार्गी लावण्यासाठी आमचे उमेदवार समर्थ आहेत.”
या सभेला भातागळी व परिसरातील शिवसैनिक, पदाधिकारी आणि ग्रामस्थ मोठ्या संख्येने उपस्थित होते. सभेतील वाढता उत्साह पाहता, महाविकास आघाडी आणि शिवसेना (उ.बा.ठा.) पक्षाच्या उमेदवारांना मतदारांचा मोठा कौल मिळताना दिसत आहे.
