उच्चशिक्षित नगरसेविका पठाण यांची सभागृहात प्रभावी मांडणी शाळांसाठी वर्गखोल्या आणि ईदगाह मैदानाला कमान उभारणीची मागणी

उच्चशिक्षित नगरसेविका पठाण यांची सभागृहात प्रभावी मांडणी शाळांसाठी वर्गखोल्या आणि ईदगाह मैदानाला कमान उभारणीची मागणी

प्रभाग १८ मधील नगरसेविकेचा अभ्यासपूर्ण पुढाकार  २७१ विद्यार्थ्यांसह मुस्लिम समाजाच्या सुविधांसाठी सभागृहात आवाज उठवला

धाराशिव | लोकमदत न्यूज

धाराशिव नगरपरिषद सर्वसाधारण सभेत काँग्रेस पक्षाच्या महिला नगरसेविका व उच्चशिक्षित म्हणून ओळखल्या जाणाऱ्या सौ. पठाण उजमा सबा अजहरखान यांनी विविध लोकहिताच्या विषयांवर अभ्यासपूर्ण व आक्रमक मांडणी करत सभागृहाचे लक्ष वेधून घेतले. त्यांच्या या भूमिकेमुळे प्रभाग १८ मधील नागरिकांमध्ये समाधान व्यक्त होत असून सर्व स्तरांतून त्यांच्या कामाचे कौतुक होत आहे.
नगरसेविका पठाण यांनी नगराध्यक्षांकडे सादर केलेल्या निवेदनात शहरातील शिक्षण व पायाभूत सुविधांशी संबंधित प्रश्न अधोरेखित केले. केंद्र व राज्य शासनाच्या विविध योजनांमधून सुविधा उपलब्ध होत असल्या तरी काही ठिकाणी अद्याप मूलभूत सोयींचा अभाव असल्याचे त्यांनी निदर्शनास आणून दिले.
विशेषतः नगरपरिषद शाळा क्र. ८ व १४ येथे विद्यार्थ्यांची संख्या मोठ्या प्रमाणात वाढली असून सध्याच्या वर्गखोल्या अपुऱ्या पडत आहेत. सुमारे २७१ विद्यार्थ्यांना शिक्षण घेताना अडचणींचा सामना करावा लागत असल्याचे त्यांनी स्पष्ट केले. यावर उपाय म्हणून नवीन वर्गखोल्या बांधण्याचा प्रस्ताव त्यांनी सभागृहात मांडला.
सन २०२५-२६ च्या नियोजनामध्ये या शाळांसाठी अतिरिक्त वर्गखोल्यांना मंजुरी देऊन लवकरात लवकर बांधकाम सुरू करावे, अशी मागणी त्यांनी सर्वसाधारण सभेमध्ये मांडली. विद्यार्थ्यांच्या शैक्षणिक हितासाठी हा विषय प्राधान्याने मार्गी लावणे आवश्यक असल्याचे त्यांनी सभागृहात ठणकावून सांगितले.
याचबरोबर शहरातील मुस्लिम समाजासाठी अत्यंत महत्त्वाच्या असलेल्या ईदगाह मैदानाच्या मुख्य प्रवेशद्वारावर कमान उभारण्याची मागणीही त्यांनी केली. शहरात ईद दिवशी नमाज अदा करण्यासाठी हे सर्वात मोठे आणि एकमेव प्रमुख ठिकाण असल्याने या ठिकाणी सुशोभीकरण व सोयीसुविधा वाढवणे गरजेचे असल्याचे त्यांनी नमूद केले. विशेष म्हणजे, आजपर्यंत कोणत्याही लोकप्रतिनिधीने या विषयाकडे गांभीर्याने लक्ष दिले नव्हते, मात्र प्रथमच कमी वयात आणि प्रथमच निवडणुकीमध्ये उभे राहून निवडून आलेल्या उच्चशिक्षित महिला नगरसेविका असूनही पठाण यांनी हा प्रश्न प्रभावीपणे मांडल्याने समाजातून त्यांचे अभिनंदन होत आहे.
विरोधी बाकांवर प्रतिनिधित्व असतानाही त्यांनी लोकहिताच्या मुद्द्यांवर आक्रमक भूमिका घेतल्याने त्यांच्या कार्यपद्धतीची चर्चा शहरभर रंगू लागली आहे.

लोकमदत न्यूज सत्य शोधून लिहिण्याची ताकद संपादक अमजद सय्यद 8390088786