एसटी प्रवासात डिजिटल क्रांती ‘RuPay On-The-Go’ स्मार्ट कार्ड योजनेने प्रवाशांना मोठा दिलासा
परिवहनमंत्री प्रताप सरनाईक यांचा पुढाकार लाखो सवलतधारकांना पारदर्शक व सुलभ सेवा
मुंबई | लोकमदत न्यूज
महाराष्ट्र राज्य मार्ग परिवहन महामंडळाच्या वतीने प्रवास अधिक सुलभ, पारदर्शक आणि डिजिटल करण्यासाठी ‘RuPay On-The-Go’ NCMC सक्षम स्मार्ट कार्ड योजना सुरू करण्यात आली आहे. या महत्त्वपूर्ण योजनेचे लोकार्पण मुख्यमंत्री देवेंद्र फडणवीस, उपमुख्यमंत्री एकनाथ शिंदे आणि श्रीमती सुनेत्रा ताई पवार परिवहनमंत्री प्रताप सरनाईक यांच्या हस्ते पार पडले.
या वेळी अमृतमहोत्सवी ज्येष्ठ नागरिक रमेश ढावरे, तसेच सवलतधारक महिला संगिता पालकर व वर्षा कांबळे यांना मान्यवरांच्या हस्ते NCMC स्मार्ट कार्डचे वितरण करण्यात आले. या उपक्रमामुळे समाजातील विविध घटकांना थेट लाभ मिळणार असल्याचे स्पष्ट झाले आहे.
या योजनेअंतर्गत विद्यार्थी, ज्येष्ठ नागरिक, दिव्यांग, महिला तसेच विविध सवलतधारक प्रवाशांना आधार क्रमांकाशी संलग्न स्मार्ट कार्ड देण्यात येणार आहे. या कार्डच्या माध्यमातून एसटी बस प्रवासातील सवलती सहज आणि पारदर्शक पद्धतीने मिळणार असून, संपूर्ण प्रणाली अधिक डिजिटल होणार आहे.
परिवहनमंत्री प्रताप सरनाईक यांनी सांगितले की, या उपक्रमामुळे राज्यातील लाखो प्रवाशांना मोठा दिलासा मिळणार आहे. एसटी सेवा अधिक आधुनिक, सोयीस्कर आणि पारदर्शक करण्याच्या दिशेने हे मोठे पाऊल असून, भविष्यात प्रवाशांचा अनुभव अधिक सुधारण्यावर भर दिला जाणार आहे.
या योजनेची अंमलबजावणी M/s. E-Infochips Technologies Ltd. आणि NSDL Payments Bank यांच्या संयुक्त विद्यमाने केली जात आहे. राज्यातील सर्व आगार व बसस्थानकांवर नोंदणी व वितरण प्रक्रिया सुरू करण्यात आली असून, सुमारे ३ हजार अधिकृत केंद्रांवरही नोंदणीची सुविधा उपलब्ध करून देण्यात आली आहे.
या डिजिटल उपक्रमामुळे एसटी प्रवास अधिक सुलभ, वेगवान आणि विश्वासार्ह होणार असून, प्रवाशांना नव्या युगातील स्मार्ट सेवांचा अनुभव मिळणार आहे.
लोकमदत न्यूज सत्य शोधून लिहिण्याची ताकद
संपादक अमजद सय्यद 8390088786
