पालकमंत्री सरनाईकांची मोठी भेट! जिल्ह्याला मिळाल्या ३० ‘राजमाता जिजाऊ’ अत्याधुनिक बस खा. ओमराजेंच्या हस्ते लोकार्पण

पालकमंत्री सरनाईकांची मोठी भेट! जिल्ह्याला मिळाल्या ३० ‘राजमाता जिजाऊ’ अत्याधुनिक बस खा. ओमराजेंच्या हस्ते लोकार्पण

धाराशिव Lokvichar – लोकविचार

राज्य परिवहन महामंडळाच्या धाराशिव विभागाच्या ताफ्यात आज तब्बल ३० नवीन ‘राजमाता जिजाऊ’ बसांची भर पडली. खासदार ओमराजे निंबाळकर यांच्या हस्ते या बसचे लोकार्पण करण्यात आले. आधुनिक सुविधा, आरामदायी आसन व्यवस्था आणि वाढीव प्रवासी क्षमतेमुळे जिल्ह्यातील प्रवाशांना अधिक सुरक्षित, सुलभ आणि दर्जेदार प्रवासाचा लाभ मिळणार आहे.

लोकार्पण समारंभाच्या प्रारंभी विभाग नियंत्रक अजय पाटील यांनी पुष्पगुच्छ देऊन खासदार ओमराजे निंबाळकर यांचे स्वागत केले. यावेळी एसटी महामंडळाचे अधिकारी, कर्मचारी तसेच नागरिक मोठ्या संख्येने उपस्थित होते.
या नव्या बसमध्ये ३ बाय २ आसन व्यवस्था असून प्रत्येकी ५६ प्रवाशांची क्षमता आहे. ग्रामीण भागातील प्रवाशांसह विद्यार्थी, महिला, ज्येष्ठ नागरिक आणि नोकरदार वर्गासाठी या बस मोठा दिलासा ठरणार आहेत.

यावेळी बोलताना खासदार ओमराजे निंबाळकर यांनी, “जिल्ह्यातील प्रत्येक गावापर्यंत आणि दुर्गम खेड्यांपर्यंत एसटी सेवा वेळेत आणि नियमित पोहोचली पाहिजे. बसची कमतरता भासल्यास राज्याचे परिवहन मंत्री तथा धाराशिवचे पालकमंत्री प्रताप सरनाईक यांच्याकडे पाठपुरावा करून आणखी बसेस उपलब्ध करून देण्यासाठी प्रयत्न करू,” अशी ग्वाही दिली.

धाराशिव जिल्ह्याचे पालकमंत्री आणि राज्याचे परिवहन मंत्री प्रताप सरनाईक यांनी पदभार स्वीकारल्यानंतर जिल्ह्यातील सार्वजनिक वाहतूक व्यवस्थेला विशेष प्राधान्य दिले जात असल्याचे दिसून येत आहे. नवीन बस उपलब्ध करून देणे, ग्रामीण भागातील सेवा मजबूत करणे आणि प्रवाशांना अधिक चांगल्या सुविधा देण्यावर त्यांनी भर दिल्याने धाराशिव विभागाच्या परिवहन सेवेत सातत्याने सुधारणा होत आहे. त्यामुळे जिल्ह्यातील एसटी सेवा अधिक सक्षम आणि लोकाभिमुख करण्याच्या दृष्टीने ही बस भर मोठे पाऊल मानली जात आहे.

या कार्यक्रमास विभाग नियंत्रक अजय पाटील, यंत्र अभियंता रविराज घोगरे, आगार प्रमुख प्रवीण भोंडवे, विभागीय वाहतूक अधिकारी मथुरा जाधवर, संतोष कोष्टी, स्थानक प्रमुख मुकेश कोमटवार, सहाय्यक कार्यशाळा अधीक्षक बालाजी बारते, वाहतूक नियंत्रक याहिया काझी, सुरज पायाळ यांच्यासह महाराष्ट्र राज्य परिवहन महामंडळाचे अधिकारी व कर्मचारी उपस्थित होते.

तसेच शिवसेनेचे रवि कोरे आळणीकर, गजानन नलावडे, माजी नगरसेवक सोमनाथ गुरव, संजय उर्फ पप्पू मुंडे, अमित उंबरे, आदित्य पाटील, काका शिनगारे, गणेश जमाले, शिवयोगी चपने, भिमा अण्णा जाधव, प्रशांत साळुंखे, तात्या पडवळ, दादा घोडके यांच्यासह अनेक प्रवासी व नागरिकांनी या लोकार्पण सोहळ्यास उपस्थिती लावली.
नवीन बसच्या समावेशामुळे धाराशिव जिल्ह्यातील एसटी वाहतूक अधिक सक्षम होणार असून ग्रामीण भागातील नागरिकांना वेळेवर, सुरक्षित आणि आरामदायी प्रवासाची सुविधा उपलब्ध होणार असल्याने प्रवाशांमध्ये समाधानाचे वातावरण आहे.

लोकविचार सत्य शोधून लिहिण्याची ताकद संपादक अमजद सय्यद 083900 88786