स्थानिक स्वराज्य संस्थांच्या निवडणुकांमुळे धाराशिव नगर परिषदेची सर्वसाधारण सभा स्थगित
नगराध्यक्ष व मुख्याधिकाऱ्यांच्या पुढाकारातून शहर विकासाच्या महत्त्वाच्या विषयांवर लवकरच नवे निर्णय अपेक्षित!
धाराशिव लोकविचार
धाराशिव नगर परिषदेची सोमवार दि. १८ मे २०२६ रोजी दुपारी १ वाजता आयोजित करण्यात आलेली सर्वसाधारण सभा ऐनवेळी स्थगित करण्यात आली. महाराष्ट्र राज्यातील स्थानिक स्वराज्य संस्थांच्या विधान परिषद निवडणुकांची घोषणा झाल्याने आचारसंहितेच्या पार्श्वभूमीवर हा निर्णय घेण्यात आला.
नगराध्यक्षांच्या दालनात आयोजित करण्यात आलेल्या या सभेमध्ये शहर विकासाशी संबंधित अनेक महत्त्वपूर्ण विषयांवर चर्चा होणार होती. मात्र निवडणूक प्रक्रिया जाहीर झाल्यामुळे आचारसंहिता जाहीर झाल्याने प्रशासनाने नियमांचे पालन करत सभा पुढे ढकलण्याचा निर्णय घेतला. नगराध्यक्ष व मुख्याधिकाऱ्यांनी विकासकामांबाबत सकारात्मक भूमिका घेत नागरिकहिताला प्राधान्य देत पुढील सभेत सर्व विषय मार्गी लावले जातील, असा विश्वास व्यक्त केला.
सभेमध्ये मागील सभेचा वृत्तांत कायम करणे, शहरासाठी महत्त्वाचा ठरणारा रिंग रोड प्रकल्प, जिजाऊ उद्यान व भोगावती घाट सुशोभीकरण, दैनंदिन घनकचरा व्यवस्थापनासाठी नव्याने निविदा प्रक्रिया राबविणे, सन २०२४-२५ मधील निधीतून वायुमायनिंग प्रकल्पास सुधारित प्रशासकीय मान्यता मिळविण्याबाबत प्रस्ताव पाठविणे, तसेच सन २०२५-२६ मधील दिव्यांग लाभार्थ्यांसाठी राखीव पाच टक्के निधी वितरण यांसारख्या महत्त्वाच्या विषयांवर निर्णय अपेक्षित होते.याशिवाय अग्निशामन विभागासाठी २०२६-२७ च्या डीपीडीसी निधीतून आवश्यक साहित्य खरेदी, दैनंदिन बाजार विकसित करणे, तसेच छत्रपती शिवाजी महाराज नाट्यगृहातील विविध विकासकामांबाबतही चर्चा होणार होती. शहराच्या विकासाच्या दृष्टीने हे विषय अत्यंत महत्त्वाचे मानले जात असल्याने नागरिकांचेही या सभेकडे लक्ष लागले होते.
नगराध्यक्ष नेहा राहुल काकडे आणि मुख्याधिकारि नीता अंधारे यांनी सांगितले की, विधान परिषद निवडणूक प्रक्रिया पूर्ण झाल्यानंतर पुढील सर्वसाधारण सभेची तारीख व वेळ जाहीर करण्यात येईल. शहर विकासाशी संबंधित सर्व प्रस्तावांवर नियमबद्ध पद्धतीने निर्णय घेण्यात येणार असून विकासकामांना गती देण्याचा प्रयत्न राहील.यावेळी सर्व पक्षांचे नगरसेवक नगराध्यक्ष, मुख्याधिकारी तसेच नगर परिषदेचे अधिकारी उपस्थित होते.
लोकविचार सत्य शोधून लिहिण्याची ताकद संपादक अमजद सय्यद 8390088786
