शनिवारपासून धाराशिव तालुक्यात ‘छत्रपती शिवाजी महाराज महसूल समाधान शिबिर’ – आ. राणाजगजितसिंह पाटील
मंडळ स्तरावरच महसुली कामांचा निपटारा तालुक्याच्या ठिकाणी हेलपाटे थांबणार
धाराशिव | लोकमदत न्यूज
महाराष्ट्र शासनाच्या वतीने नागरिकांना महसुली सेवा त्यांच्या गावातच आणि एकाच दिवशी उपलब्ध करून देण्यासाठी “छत्रपती शिवाजी महाराज महसूल समाधान शिबिर” अभियान टप्पा क्रमांक १ अंतर्गत धाराशिव तालुक्यात विशेष महसूल शिबिरांचे आयोजन करण्यात आले आहे. या अभियानाची सुरुवात शनिवार, दि. ७ मार्च रोजी केशेगाव येथून होणार असून मंडळ स्तरावर नागरिकांच्या महसुली कामांचा निपटारा केला जाणार आहे. त्यामुळे नागरिकांचे तालुक्याच्या ठिकाणी होणारे हेलपाटे मोठ्या प्रमाणात कमी होणार आहेत.
शिबिराच्या नियोजित वेळापत्रकानुसार ७ मार्च रोजी केशेगाव, ११ मार्च रोजी बेंबळी, १४ मार्च रोजी तेर, १७ मार्च रोजी करजखेडा, १८ मार्च रोजी ढोकी, ८ एप्रिल रोजी आंबेजवळगा, १० एप्रिल रोजी जागजी, १७ एप्रिल रोजी पाडोळी (आ), ८ मे रोजी धाराशिव ग्रामीण आणि १५ मे रोजी धाराशिव शहर मंडळ कार्यालय येथे ही शिबिरे पार पडणार आहेत. सर्व शिबिरे सकाळी ११ वाजता सुरू होतील.
या शिबिरांमध्ये रस्ते विषयक अडचणींचे निवारण, जिवंत सातबारा मोहीम, सामाजिक अर्थसहाय्य योजनांसाठी अर्ज स्वीकारणे, विद्यार्थ्यांच्या शैक्षणिक दाखल्यांसाठी अर्ज स्वीकारणे, मंजूर फेरफार प्रकरणातील सातबारा व फेरफार उतारा वाटप, सातबाऱ्यातील त्रुटी दुरुस्ती, तसेच भोगवटदार वर्ग २ जमीन वर्ग १ मध्ये परावर्तनाबाबत मार्गदर्शन आदी विविध महसुली कामांचा निपटारा करण्यात येणार आहे.
धाराशिव तालुक्यातील सर्व ग्रामस्थ, शेतकरी, विद्यार्थी आणि नागरिकांनी आवश्यक कागदपत्रांसह संबंधित शिबिरस्थळी उपस्थित राहून शासनाच्या या उपक्रमाचा लाभ घ्यावा, असे आवाहन राणाजगजितसिंह पाटील यांनी केले आहे.
लोकमदत न्यूज सत्य शोधून लिहिण्याची ताकद
संपादक अमजद सय्यद 8390088786
